O nosso centro está situado em Compostela e forma parte do Projeto Educativo Semente, com centros em Lugo, Trasancos, Corunha, Compostela e Vigo. É umha iniciativa social sem ánimo de lucro que pretende conformar, junto com outros projetos semelhantes, as bases necessárias para a criaçom da Escola Nacional Galega. O nascimento da Semente, porém, nom é um acontecimento novo na nossa história, fai parte duma longa tradiçom na qual podemos significar as Escolas de Ensino Galego, fundadas em 1923 polas Irmandades da Fala.

Na Semente Compostela todas as atividades som desenvolvidas em língua galega, favorecendo a aquisiçom, conservaçom, cuidado e consolidaçom da mesma. O idioma galego é compreendido como parte indissolúvel da nossa cultura, da nossa história e do nosso futuro, e defendemos o seu carácter internacional; criando um espaço de interculturalidade e fomentando o respeito e aprendizagem em relaçom a outras culturas e línguas. O Projeto Educativo Semente alicerça-se, ademais, nos seguintes princípios:

Pedagogia crítica e transformadora: os centros semente fam parte do tecido social e associativo de cada cidade, servindo aos interesses das classes populares e garantindo o desenvolvimento dum proceso de aprendizagem democrático, crítico e integral.

Laicidade: representa a condiçom de possibilidade para o exercício da liberdade de pensamento e consciência, assim como para a construçom dum conhecimento crítico e científico.

Coeducaçom: Um espaço de educaçom integral para as crianças com umha educaçom baseada na igualdade de género em todos os aspectos da vida. Um espaço nom patriarcal e sem machismo que favorece o caminho das nossas crianças para o empoderamento.

Assembleia: Um modelo de decisom em que participam dumha forma horizontal pais, maes, professoras e crianças. A educadora ou educador e as famílias mantenhem umha relaçom directa e de confiança no que respeita à educaçom conjunta das meninhas e meninhos.

Educaçom inserida na natureza: As crianças percebem os valores ambientais da nossa terra mediante a interaçom com o ambiente, através das saídas, roteiros, uso da horta, etc. Mas também no próprio espaço da escola favorecendo o uso de materiais reciclados ou o consumo responsável.

Liberdade responsável, o respeito e a autorregulaçom: As educadoras confiam plenamente na criança, respeitam-na como pessoa acompanhando as suas emoçons e proporcionando as ferramentas necessárias para solucionarem os seus conflitos por si próprias. Tenta-se favorecer a plena consciência por parte da criança da sua liberdade, mas também da existência duns limites básicos de respeito a outras pessoas e ao seu contexto.

Espaço educativo interativo: A educadora é umha mediadora que acompanha a criança no seu processo de aprendizagem. A relaçom pedagógica consiste no provimento das condiçons em que educadora e criança podam colaborar para fazerem progredir essas trocas que favorecem o desenvolvimento integral das meninhas/os e a aprendizagem mútua, apoiando-se num ambiente preparado.

Interculturalidade: As crianças compreendem a importáncia e o respeito doutras culturas que vivem no nosso país e que permitem interagir, crescer e trabalhar conjuntamente.

Criatividade e inovaçom: favorecendo o pensamento divergente graças à organizaçom de espaços e meios faverecedores do desenvolvimento das capacidades ético-estéticas das crianças.

Educaçom galega, aberta à comunidade: ligada à realidade do seu bairro, com um currículo aberto, global e flexível, inserido na realidade social, histórica, cultural e económica galega.